Mark 15

Laha hakahita *Jises hani kapi Pailat

Mt 27:1-2, 11-26; Lk 23:1-5, 13-25; Jn 18:28-19:16

1Pate letu wanen, hatesol masiwi ti teka *Ju apuha ailei namil ti waliko tenen na lato aile hani Jises. Lato xioti i ape hakahita hani kapi Pailat, tel ti teka masiwi ti *Rom kiliwakei Judia.

2Pailat kamei Jises, “Nakon o tel masiwi tapein ti teka Ju?”

Jises kak pahoi ukek, “Masin ti o kakawen.”

3Teka masiwi tuah ti hukuminiai Haeu ma seilon lato kak susului Jises hani Pailat ti kilan waliko tenen puputa. 4Ape Pailat kamei ulei i, “Tap pahoan tetam? Hongoa, kilan waliko laha susului o.” 5Tuahe tin Jises tai wix pahoi. Pailat pate i ongaini.

6Leili taun ti angiain lalap ti nameniai ngain ti Haeu waxi aliake teka Ju ti *Igip, saun ti Pailat i ahuti tel ti teka kalabus, tetel na teka seilon pahalaha. 7Ti lokon ien tel seilon axan Barabas i kakalabus kapi teka seilon tuaun nake lato hil pahoi teka masiwi ti kiliwakei xuxulaha. Ti leili hilehile lato teleiwen hina seilon. 8Kilan seilon nahih hani kapi Pailat kameian ti ahutiai tel na kalabus.

9Pailat kamei laha, “Pahamuto nga ahuti hani amuto tel masiwi tapein ti teka Ju?” 10Pailat pate i tioi ka teka masiwi tuah ti hukuminiai Haeu ma seilon hangaini Jises hani i tuahe ti wawatak nake kilan seilon sameni i. 11Tuahe teka masiwi tuah ti hukuminiai Haeu ma seilon kak hahika teka seilon ti laha apupuha ien kameiai Pailat ti ahuti hanialaha Barabas, kumahe Jises.

12Pailat kamei ulei laha, “Pahamuto ape nga aile waliko la wanen hani tetel seilon amuto ukek i tel masiwi tapein ti teka Ju?”

13Laha tilol pahoi Pailat, “Teleiwa i! Tahi hakeawa i he *kros!”

14Pailat kamei laha, “Nake lahan? Waliko la pate lialun i aile talesiwen?”

Laha tilol ausini aheke, “Tahi hakeawa i he kros!”

15Pailat pahan i hamuamua teka seilon. Aile ape i ahuti Barabas. I hani tesol unauan ti hile heti Jises ape hakahita lehe waxi lato tahi hakea i hani he kros.

Teka unaui Pailat ti hile soxeni Jises

Mt 27:27-31; Jn 19:2-3

16Tesol unaui Pailat ti hile ati hasoho Jises hani tehu ing lalap, ingi Pailat, ape lato tiloi tesol tuaulato. 17Lato waxi teik maia tenen kakai ati polun ape sosoi hani Jises. Lato alingini ngaxe au ape nihini hana hani he patun. 18Ape lato soxeni i ukek, “Tel masiwi tapein ti teka Ju tap tahi mateam!” 19Lato uke teik pata xai tuhituhi patun ape lato pukeini i. Lato lokuha hanowi ka lato lotu sameni i. 20Ti lato heisawa soxenian, lato naxi xaxaweni teik maia. Lato sosoi aliake i teik puki soson ape ati i lehe lato tahi hakea i hani he kros.

Laha tahi hakea Jises he kros pata

Mt 27:32-44; Lk 23:26-43; Jn 19:17-27

21Ti lato hakahitawa Jises, lato apatuini tel seilon axan Saimon nahih hahaniwa taon. Teka unaui Pailat ti hile lungei i kaui teik kros ti Jises kakau. Saimon akiki tehu taon lalap axan Sairini, tame Aleksanda ma Rupus. 22Lato hakahita Jises hani tesol axan Golgota. Teik kakain ien i ukek, “Tetesol tanoman masin kui pati seilon.” 23Ape lato axi i unum ti hamongai moloan tuahe Jises kum unumi. 24Lato tahi hakea Jises he teik kros pata ape lato sei puxuaun wasolalato. Lato halokeni satu ti upiai tetel i uke tetenen ia ti tesol sose Jises.

25Ti 9 kilok letu lato hakea Jises. 26Teik kakain ti suluian lato tahi hahakea onote patun i kak ukek,

“Tel Masiwi Tapein ti teka Ju.”

27Tin lato tahi hakea hua seilon ti xuxuina xohixohin kapi Jises, tel sai manau ape tel sai kalamau. 28Kakai Haeu i poponowi hawane ti i ukek, “Laha aile hanowi i seilon tenen woun pate lialun.” ^a

29Teka seilon ti laha nahih sahiwa Jises, laha tohutoh ape kak soxeni ma kak halialu i ukek, “Se o tel seilon o ukek o toi tehu *Ingi Haeu ape muhi ngain toluhu o hatuhi aliake! 30Awai aliakewa o. Na o pon, mosulih he teik kros ien!”

31Teka masiwi tuah ti hukuminiai Haeu ma seilon, ma *teka hanaui nauna ti Moses, tin lato tutu ien papaxai Jises ape lato he kakak ukek, “I huali uke seilon liai tuahe i kum pon huali aliakean. 32Na kako paxai ka tel *Krais ie, tetel masiwi tapein ti *Israel, i mosulih he teik kros, kako soh tetan.” Huhua lalu akeak kapi Jises tin lalu kak halialu i.

Matei Jises

Mt 27:45-56; Lk 23:44-49; Jn 19:28-30

33Ti lape ngain, hatehu xux i tilok ti leili aua toluhu. 34Ti 3 kilok alohah, Jises tilol eliel hawane, “Eloi Eloi, lama sabatani?” Ien i ukek, “Haeu tetak, Haeu tetak, nakon lahan o lioi hawane nga?” ^b

35Teka seilon xohixohin kapin, laha ukek, “Hongoa, i titiloi *Elaija.”

36Tel i kiliwau waxi teik maia, i xomi hani he waen tenen wangingian ape i hana hani tumi teik pata. I tulini hani he awe Jises lehe waxi i sumuxi. I ukek, “Nutomu, kako paxaimu na Elaija mosulih ape hamosu i he teik kros.”

37Jises ausini eliel hawane ape i mat. 38Tataen ien wanen Haeu lexi teik maia i akeak leili tehu *Ingi Haeu, ti patul hani taen itan. 39Tel ti teka unaui Pailat ti hile tutu mate Jises. I paxai otioti sale matei Jises ape i ukek, “Salan wanen tel seilon ie Nati Haeu!”

40Teka hehin tu siasia paxaiai Jises. Leilolato Mary Magdalen, Salome ma Mary, tel tini Joses ma Jeims tel uluha. 41Lokon ti Jises tutuen Galili tesol hehin ien lawe lato kakahiti ma huhuali i. Kilan hehin liai laha kahitima Jises hani Jerusalem, laha tin ien.

Sale tihiniai Jises

Mt 27:57-61; Lk 23:50-56; Jn 19:38-42

42Sai alohah ti tehu ngain ti apeseniai *Sabat. 43Josep ti Arimatea i nahih hani kapi Pailat ape i matut kamean na i waxi auni tupui Jises. Josep i tel ti tesol masiwi ti teka Ju. I to mon atetengi ngain ti Haeu neini lawe seilon. 44Pailat pate i kum amemene ti i hongoa kiliwai matei Jises. I tiloi tel unauan ti hile ape kamei i na salan Jises matewen. 45Ti i hongoa ka salan, i hani Josep waxi tupui Jises. 46Josep kahui teik maia ti auniai seilon maten. I hamosu Jises hani itan ape i puxui talini tupuan. I hana auni hani leili amal tenen laha tanomi he pot patul ti hepekeun. Muhin i hulini tehu pot lalap siponiai tehu amal. 47Mary Magdalen ma Mary tel tini Joses ma Jeims, lalu niningahi tesol ti Josep hahana tupui Jises.